Það er fátt nýtt undir Sólinni

 

En þessa dagana er það væntanlegur ,,sólmyrkvi“ sem heldur mönnum uppteknum.

Trump er sem horfinn af sviðinu, Zelensky líka og við vitum alls ekki hvað þessum föllnu(?) stjörnum dettur í hug næst.

Ný apategund er fundin í Kongó sem er með varir í öðrum lit en gerist og gengur með þessa ættingja okkar manna.

Og það stendur til að kjósa um hvort sótt verði um aðild Íslands að ESB- inu og sitt sýnist hverjum um þann draum og/eða martröð, eftir því hvernig menn líta á málið.

Það er barist í Evrópu austanverðri, það eru Úkraína og Rússland sem takast á, en svo er komið að það er sem Úkraína sé verktaki fyrir vestrið í baráttunni við austrið.

Sólin kemur upp í austri hvort sem mönnum líkar það betur eða verr og því verður ekki breytt þó einhverjum geti langað til þess og nú vill enginn missa af því að sjá hana hverfa á bakvið Tunglið!

Það er eins og ætíð þegar þjóðir takast á með vopnum, að það er fyrst og fremst almenningur sem sýpur seiðið af fyrirganginum og vitanlega líka hermennirnir sem eru særðir, lemstraðir á sál eða drepnir.

Fórna sér fyrir þjóð sína og misvitra ráðamenn en ráða sjálfir litlu sem engu um eigin nútíð né framtíð sem of oft er engin.

Mannskepnan lærir líklega aldrei á friðinn og því er sem er, að blóði er úthellt til einskis og lífum fórnað.

Sagan kennir að öllum ófriði ljúki að lokum, en eftir sitja sorgir sem engin leið er að bæta.

UFO og RUV

 Ruvarar eru talsvert uppteknir af fljúgandi furðuhlutum þennan daginn.

Þeir birta mynd af einum slíkum grip og segja hana vera komna frá varnarmálaráðuneyti Bandaríkjanna og að hún sé tæpra 80 ára gömul.

Eins og sjá má er hluturinn hinn merkilegasti!

Mulder og Skully voru ekki komin á sviðið þegar myndatakan fór fram, þau komu seinna og skemmtu aðdáendum sínum m.a. í íslensku sjónvarpi allra landsmanna.

Ritari gleymir því ekki hve gaman hann hafði af þessum ævintýrum og gætti þess vel að missa ekki af nokkrum þætti.

Vídeóið var ekki komið til sögunnar, það gerðist seinna, en hefði það verið til staðar á heimilinu hefði maður getað tekið þættina upp, til að gefa bandarískum forsetanefnum og efnum í tækifærisgjöf ... og Miðflokksmönnunum íslensku, svo þeir hefðu eitthvað til að hugsa um.

Biden hinn illa áttaði, eltist við svipuð fyrirbrigði sem reyndust ýmist vera hugarfóstur rugludalla eða loftbelgir sem ærslafullir strákar og stelpur höfðu látið svífa á loft.

Geimverur fundust engar, Xi leiddi ruglið hjá sér og Putin færði riddara til um einn leik og amrískir guttar skemmtu sér konunglega í konungslausu landi!

Myndin sem hér fylgir mun áður hafa verið trúnaðarmál, en nú er kominn Trump og ekkert slíkt trúnaðar-eitthvað og bull lengur til staðar og þvaðrið er í heiðri haft og við förum eftir því!  

Skipið og byssan

 Það var haldinn fundur í Istanbul, skip kom út úr þoku, byssa var gefin og ábyrgðin var mikil.

Þetta er voðalegt að sjá og ekki bætir úr að skipið mun vera rússneskt!

Tyrklandsforseti gaf öllum byssu eftir fundarsetuna og það er eflaust misjafnt hvernig farið verður með gjöfina!

Kristrún mun ætla að láta gera gripinn óvirkan en hvað verður eftir það, veit enginn.

Byssa er ekki byssa nema byssa sé, sagði einhver og því er það vel gert af íslenskum forsætisráðherra, að ,,hundsa" byssuna og sjá til þess að hún verði engum að skaða.

Byssur eru drápstól og hvað hinum tyrkneska gengur til vitum við ekki með vissu, en afþökkum annað Tyrkjarán ef það skyldi nú standa til.

Það var ægilega gaman að eiga byssu þegar ritari var strákur á hlaupum um götur Reykjavíkur á árum áður og eitt sinn gerði hann tilraun til að drepa mann þegar hann var í eltingarleik við frænda sinn.

Til stóð að skjóta frændann en bráðlætið var of mikið og það gleymdist að kanna hver það væri sem sem handan hornsins var að koma.

Það kom hvellur og manninum brá og byssuguttinn forðaði sér í bráða hasti í hvarf svo hann yrði ekki tekinn fastur fyrir að ráðast á saklausan mann á göngu í Aðalstræti Reykjavíkur- óborgar, því engin var borgin þegar þetta var.

Tímarnir breytast og strákarnir með; breytast úr guttum yfir í fullorna menn og síðan gamla karla og ég vona að hinum skotna og þó óskotna manni sem var handan við hornið hafi ekki brugðið svo að hann hafi gengið hlægjandi á brott.

Guttarnir þorðu ekki annað en forða sér á góðan stað áður en hláturinn sprakk fram.

Kannski fór ritari út af strikinu en það verður að hafa það og upplýst er að forsætisráðherrann okkar ætlar að koma byssunni erdónsku í hendur góðra manna sem kunna að gera byssur óvirkar og það svo, að þær verða ekki einu sinni ,,knallettubyssur" eftir breytinguna.

En hvað varð um skipið? Sigldi það bara sinn sjó? Var Putin um borð? Og kannski Trump líka?

Já það eru margar spurningarnar sem vakna en hvað er og hvað verður næst vitum við ekki.

Dagurinn í dag og lítils háttar upprifjun

 Í dag verður að mestu stuðst við framlag Morgunblaðsins til frétta dagsins, en vel getur verið að farið verði eitthvað út af því sporinu líka!

Þar er fyrst frá því að segja, að fyrrverandi hagfræðingur Bændasamtakanna telur að ekki sé rétt að lækkun matvælaverðs verði eins mikil og látið hefur verið í veðri vaka að geti orðið, ef Íslandi verði komið inn í ESB-ið svo sem núverandi utanríkisráðherra og fleiri dreymir um að verði.

Erna útskýrir þetta allt ágætlega í grein sinni sem hægt er að lesa á myndunum sem hér fylgja með, þ.e.a.s. ef menn hafa ekki aðgang að blaðinu eftir öðrum leiðum.

Í ríkisstjórn Kristrúnar Frostadóttur er ráðherra sem fer með umhverfis-, orku og loftslagsmál og finnst eflaust mörgum að tímabært hafi verið að að koma slíku ráðuneyti á laggirnar, eftir stjórnleysistímabilið sem ríkt hafði í tíð fyrri ríkisstjórnar.

Það er ekki ofsagt að það hafa blásið ferskir vindar um orkumálin eftir að þau komust í hendur þeirra sem þora að gera meira en það eitt, að flandra um heiminn á kostnað þjóðarinnar, engum til gagns og síst af öllu þjóðinni sem farið er fyrir.

Það var komið mál á að endurnýja í forystuna í landsmálunum og það gerði þjóðin eftir að vinstrigræna- framsóknar- íhaldsstjórnin sprakk á limminu og boðaði blessunarlega til vetrarkosninga í stað þess að bíða eftir vorinu!

Það er búið að vera vor í lofti í stjórnmálum íslensku þjóðarinnar eftir það, þó ekki sé hægt að neita því að ýmislegt mætti vera öðruvísi og dapurlegt er hvernig haldið er áfram að ausa peningum þjóðarinnar í svokölluð ,,stjórnvöld“ í Úkraínu. Stjórnvöld sem búin eru að steypa þjóð sinni í glötun með mikilmennsku æði, sem ekki er innistæða fyrir.

,,Upplýst“ var í fréttum gærdagsins að það hefði verið að undirlagi þeirra afla sem gasleiðslurnar miklu voru sprengdar og ýmis annar ,,sómi“ hefur verið rakin til þeirra ógæfuafla, afla sem bæði fyrrverandi ríkisstjórn og núverandi, hafa ausið í peningum íslenskrar þjóðar, til einskis.

Þá var nú björgulegra það sem áður var gert að senda fólkinu prjónles inn í austur- evrópskan vetur, en það var ekki talið nóg og því var boðið upp á hopp og hí og lúxusbíla, í Hörpu og á Þingvöllum svo tvö dæmi séu tekin.

Við skulum vona að núverandi ríkisstjórn nái áttum í utanríkismálunum og haldi áfram að taka til í landsmálunum, því ekki veitir af að taka þar til hendinni, eftir það sem á undan var gengið.Dagurinn í dag og upprifjun

Ekkert er nýtt undir sólinni

 Frásagnirnar finnum við í CNN.COM

CNN segir okkur frá og eins og sjá má, er flygildið ekki frýnilegt og í engu líkt neinu sem við höfum áður séð.

En það er fleira að sjá á miðlinum og þ.á.m. það, að farið er með okkur enn lengra aftur í tímann og inn í kjarna Vetrarbrautarinnar okkar og þar er svo sannarlega ýmislegt að ,,sjá", þó við getum í raun ekkert ,,séð".

En vísindamenn okkar eru ráðagóðir og þeim tekst að draga upp mynd af því hvernig miðja Vetrarbrautarinnar lítur út og sé ,,fuglinn" sérstakur, þá er miðja stjörnuþoku okkar ekki síður athygli verð.

Einn lítill fugl er ekki mikill fyrir sér í samanburði við það sem ,,sjá" má í miðju Vetrarbrautarinnar, í miðju þess heims sem við búum í.

En við erum svo heppin að eiga vísindamenn sem kunna að draga ályktanir og síðan í framhaldi af því, að draga upp mynd af því sem þar er að ,,sjá", sem ekkert er að sjá!

Við ljúkum þessu með því að benda á enn eina greinina í vísindahluta miðilsins góða, þar sem vísað er til dularfullra örvera en Ásgarður er nefndur í því sambandi.

Hvað er að gerast?

 Það ríkir ófriðarástand í heiminum sem eðlilegt er að hafa áhyggjur af og við vitum ekki hvernig það ástand leysist ef það þá gerir það, sem við vonum væntanlega flest að verði.

En það er ýmislegt fleira sem vert er að hafa áhyggjur af, eins og s.s. það sem sagt er frá í þessari frétt CNN.

CNN.COM segir frá breytingum sem eru að verða í hafinu í grennd við Ísland.

Í upphafi greinarinnar segir: ,,Í Norður-Atlantshafi, sunnan við Grænland og Ísland, er eitthvað mjög undarlegt að gerast á stóru svæði í sjónum.

Þó hafið sé að hitna hefur það verið að kólna á þeim slóðum.

Í nýrri rannsókn telja menn sig hafa komist að skýringu á þessu sem er, að um sé að ræða ógnvænlegt merki um að komið sé að að vendipunkti í loftslagsbreytingunum ."

En að öðru.

Í Heimildinni er fjallað um ástandið sem er í miðausturlöndum þ.e. nágrannalöndum Ísraels, þar sem vaðið er yfir með herafli, fólk drepið og hrakið af heimilum sínum þ.e.a.s. ef þau eru þá uppistandandi, því algengast er að allt sé í rúst s.s. sjá má á Gaza.

                                                        Mynd úr grein Heimildarinnar

Áður var það Gaza en nú er það Líbanon og útþenslan er alls ekki hætt.

Forystumenn Ísraels eru að skapa sögu sem við áttum ekki von á að yrði og alls ekki, að hún yrði sköpuð af þjóðinni sem þola mátti hinar viðbjóðslegu aðfarir nasista.

Bandarískir ráðamenn vilja ráða heiminum og stjórna, það er s.s. ekkert nýtt og þau eru æði mörg löndin sem orðið hafa þeim að bráð.

Vietnam, Írak, Kúba, Venesúela og fleiri oig fleiri...

Þeir sem ráða för fara sínu fram, en það er ekki endilega víst að bandaríska þjóðin sé öll ánægð með það sem er að gerast.

Hvað verður vitum við ekki, en dýrmætt væri ef það tækist að stilla til friðar.

Við lifum í voninni!

Vinur er...

 

,,Vinur er sá er til vamms segir“, en gerði hann það á trúverðugan hátt?

Jún 7, 2026

Óflokkað

Zelensky skrifaði Putin bréf og hvatti hann til að mæta til friðarviðræðna til að stöðva stríðið sem er milli þjóðanna. Stríð sem staðið hefur árum saman og virðist ekki sjá fyrir endann á.

Ekki veit undirritaður hvað Putin hefur gert við bréfið en það hefur verið gert opinbert og líklega hefur hann komið því í góða varðveislu til að geta vitnað í það seinna meir.

Sá sem vill þjóð sinni það besta, sendir ekki frá sér samsuðu eins og þá sem hefur mátt lesa á netmiðlum en gera má ráð fyrir að ,,bestu vinir aðal“ séu ánægðir.

Úkraínska þjóðin þarf frið og það þarf rússneska þjóðin líka, en það stuðlar tæplega að friði milli stríðandi þjóða að senda mótherja samsuðu af því tagi sem lesa mátti og sagt var vera bréf Zelenskys til Putin.

Hvort það var rétta bréfið vitum við ekki með vissu en skrítið er það, svo varlega sé til orða tekið.

Hvort Putin mun svara ritsmíðinni veit sá sem þetta ritar vitanlega ekki neitt um, en ólíklegt er það og líklegt er að hér gildi, ,,að hér var verr af stað farið en heima setið“ því það er ekki samsuða af þessu tagi sem þjóðirnar tvær þurfa á að halda frá leiðtogum sínum.

Dýrmætt hefði það verið, ef Zelensky hefði sent Putin yfirvegað, vandað og málefnalegt bréf, þar sem bent hefði verið á lausnir í deilunum sem uppi eru milli landanna.

Það var ekki gert og því kemur líklega ekkert út úr þessari uppákomu.

Myndin sem er hér að ofan er fengin frá AP og er hún ekki tengd sendingunni umræddu að öðru leiti en því, að hún er af þeim sem sagður er vera höfundur bréfsins.