Dagurinn í dag og lítils háttar upprifjun

 Í dag verður að mestu stuðst við framlag Morgunblaðsins til frétta dagsins, en vel getur verið að farið verði eitthvað út af því sporinu líka!

Þar er fyrst frá því að segja, að fyrrverandi hagfræðingur Bændasamtakanna telur að ekki sé rétt að lækkun matvælaverðs verði eins mikil og látið hefur verið í veðri vaka að geti orðið, ef Íslandi verði komið inn í ESB-ið svo sem núverandi utanríkisráðherra og fleiri dreymir um að verði.

Erna útskýrir þetta allt ágætlega í grein sinni sem hægt er að lesa á myndunum sem hér fylgja með, þ.e.a.s. ef menn hafa ekki aðgang að blaðinu eftir öðrum leiðum.

Í ríkisstjórn Kristrúnar Frostadóttur er ráðherra sem fer með umhverfis-, orku og loftslagsmál og finnst eflaust mörgum að tímabært hafi verið að að koma slíku ráðuneyti á laggirnar, eftir stjórnleysistímabilið sem ríkt hafði í tíð fyrri ríkisstjórnar.

Það er ekki ofsagt að það hafa blásið ferskir vindar um orkumálin eftir að þau komust í hendur þeirra sem þora að gera meira en það eitt, að flandra um heiminn á kostnað þjóðarinnar, engum til gagns og síst af öllu þjóðinni sem farið er fyrir.

Það var komið mál á að endurnýja í forystuna í landsmálunum og það gerði þjóðin eftir að vinstrigræna- framsóknar- íhaldsstjórnin sprakk á limminu og boðaði blessunarlega til vetrarkosninga í stað þess að bíða eftir vorinu!

Það er búið að vera vor í lofti í stjórnmálum íslensku þjóðarinnar eftir það, þó ekki sé hægt að neita því að ýmislegt mætti vera öðruvísi og dapurlegt er hvernig haldið er áfram að ausa peningum þjóðarinnar í svokölluð ,,stjórnvöld“ í Úkraínu. Stjórnvöld sem búin eru að steypa þjóð sinni í glötun með mikilmennsku æði, sem ekki er innistæða fyrir.

,,Upplýst“ var í fréttum gærdagsins að það hefði verið að undirlagi þeirra afla sem gasleiðslurnar miklu voru sprengdar og ýmis annar ,,sómi“ hefur verið rakin til þeirra ógæfuafla, afla sem bæði fyrrverandi ríkisstjórn og núverandi, hafa ausið í peningum íslenskrar þjóðar, til einskis.

Þá var nú björgulegra það sem áður var gert að senda fólkinu prjónles inn í austur- evrópskan vetur, en það var ekki talið nóg og því var boðið upp á hopp og hí og lúxusbíla, í Hörpu og á Þingvöllum svo tvö dæmi séu tekin.

Við skulum vona að núverandi ríkisstjórn nái áttum í utanríkismálunum og haldi áfram að taka til í landsmálunum, því ekki veitir af að taka þar til hendinni, eftir það sem á undan var gengið.Dagurinn í dag og upprifjun

Ekkert er nýtt undir sólinni

 Frásagnirnar finnum við í CNN.COM

CNN segir okkur frá og eins og sjá má, er flygildið ekki frýnilegt og í engu líkt neinu sem við höfum áður séð.

En það er fleira að sjá á miðlinum og þ.á.m. það, að farið er með okkur enn lengra aftur í tímann og inn í kjarna Vetrarbrautarinnar okkar og þar er svo sannarlega ýmislegt að ,,sjá", þó við getum í raun ekkert ,,séð".

En vísindamenn okkar eru ráðagóðir og þeim tekst að draga upp mynd af því hvernig miðja Vetrarbrautarinnar lítur út og sé ,,fuglinn" sérstakur, þá er miðja stjörnuþoku okkar ekki síður athygli verð.

Einn lítill fugl er ekki mikill fyrir sér í samanburði við það sem ,,sjá" má í miðju Vetrarbrautarinnar, í miðju þess heims sem við búum í.

En við erum svo heppin að eiga vísindamenn sem kunna að draga ályktanir og síðan í framhaldi af því, að draga upp mynd af því sem þar er að ,,sjá", sem ekkert er að sjá!

Við ljúkum þessu með því að benda á enn eina greinina í vísindahluta miðilsins góða, þar sem vísað er til dularfullra örvera en Ásgarður er nefndur í því sambandi.

Hvað er að gerast?

 Það ríkir ófriðarástand í heiminum sem eðlilegt er að hafa áhyggjur af og við vitum ekki hvernig það ástand leysist ef það þá gerir það, sem við vonum væntanlega flest að verði.

En það er ýmislegt fleira sem vert er að hafa áhyggjur af, eins og s.s. það sem sagt er frá í þessari frétt CNN.

CNN.COM segir frá breytingum sem eru að verða í hafinu í grennd við Ísland.

Í upphafi greinarinnar segir: ,,Í Norður-Atlantshafi, sunnan við Grænland og Ísland, er eitthvað mjög undarlegt að gerast á stóru svæði í sjónum.

Þó hafið sé að hitna hefur það verið að kólna á þeim slóðum.

Í nýrri rannsókn telja menn sig hafa komist að skýringu á þessu sem er, að um sé að ræða ógnvænlegt merki um að komið sé að að vendipunkti í loftslagsbreytingunum ."

En að öðru.

Í Heimildinni er fjallað um ástandið sem er í miðausturlöndum þ.e. nágrannalöndum Ísraels, þar sem vaðið er yfir með herafli, fólk drepið og hrakið af heimilum sínum þ.e.a.s. ef þau eru þá uppistandandi, því algengast er að allt sé í rúst s.s. sjá má á Gaza.

                                                        Mynd úr grein Heimildarinnar

Áður var það Gaza en nú er það Líbanon og útþenslan er alls ekki hætt.

Forystumenn Ísraels eru að skapa sögu sem við áttum ekki von á að yrði og alls ekki, að hún yrði sköpuð af þjóðinni sem þola mátti hinar viðbjóðslegu aðfarir nasista.

Bandarískir ráðamenn vilja ráða heiminum og stjórna, það er s.s. ekkert nýtt og þau eru æði mörg löndin sem orðið hafa þeim að bráð.

Vietnam, Írak, Kúba, Venesúela og fleiri oig fleiri...

Þeir sem ráða för fara sínu fram, en það er ekki endilega víst að bandaríska þjóðin sé öll ánægð með það sem er að gerast.

Hvað verður vitum við ekki, en dýrmætt væri ef það tækist að stilla til friðar.

Við lifum í voninni!

Vinur er...

 

,,Vinur er sá er til vamms segir“, en gerði hann það á trúverðugan hátt?

Jún 7, 2026

Óflokkað

Zelensky skrifaði Putin bréf og hvatti hann til að mæta til friðarviðræðna til að stöðva stríðið sem er milli þjóðanna. Stríð sem staðið hefur árum saman og virðist ekki sjá fyrir endann á.

Ekki veit undirritaður hvað Putin hefur gert við bréfið en það hefur verið gert opinbert og líklega hefur hann komið því í góða varðveislu til að geta vitnað í það seinna meir.

Sá sem vill þjóð sinni það besta, sendir ekki frá sér samsuðu eins og þá sem hefur mátt lesa á netmiðlum en gera má ráð fyrir að ,,bestu vinir aðal“ séu ánægðir.

Úkraínska þjóðin þarf frið og það þarf rússneska þjóðin líka, en það stuðlar tæplega að friði milli stríðandi þjóða að senda mótherja samsuðu af því tagi sem lesa mátti og sagt var vera bréf Zelenskys til Putin.

Hvort það var rétta bréfið vitum við ekki með vissu en skrítið er það, svo varlega sé til orða tekið.

Hvort Putin mun svara ritsmíðinni veit sá sem þetta ritar vitanlega ekki neitt um, en ólíklegt er það og líklegt er að hér gildi, ,,að hér var verr af stað farið en heima setið“ því það er ekki samsuða af þessu tagi sem þjóðirnar tvær þurfa á að halda frá leiðtogum sínum.

Dýrmætt hefði það verið, ef Zelensky hefði sent Putin yfirvegað, vandað og málefnalegt bréf, þar sem bent hefði verið á lausnir í deilunum sem uppi eru milli landanna.

Það var ekki gert og því kemur líklega ekkert út úr þessari uppákomu.

Myndin sem er hér að ofan er fengin frá AP og er hún ekki tengd sendingunni umræddu að öðru leiti en því, að hún er af þeim sem sagður er vera höfundur bréfsins.

Um úlfa og fl.

 Nýbúinn að leggja frá sér bók eftir David Attenborrough þar sem segir frá því hvernig ágangur mannskepnunnar hefur þrengt að dýralífi og jurta, rekst sá sem þetta ritar, á grein eftir Borgþór Arngrímsson í Heimildinni, þar sem sagt er frá endurkomu úlfa til V- Evrópu.

Með grein Borgþórs fylgir þessi mynd af úlfi sem virðist líklegur til þess að vera að reyna að finna sér eitthvað nærandi.

Eins og við er að búast, er greinin vel skrifuð, fróðleg og góð aflestrar og við sjáum úlfana í nýju ljósi og í hugann kemur sagan af Rauðhettu, auk þess sem upp rifjast að í Sovétríkjunum fyrrverandi, mun kona nokkur hafa stundað rannsóknir á þessum skepnum og m.a. hafa kannað, hvort hægt væri að temja þá og umgangast líkt og hunda.

Ekki man ritari með vissu hvað út úr þeim rannsóknum kom, en gaman væri ef það fengist upplýst.

Ekki verður farið í heimsókn í rússneska sendiráðið á Íslandi til að afla upplýsinga eftir að ráðherra nokkur, sem reyndar er frú, rak sendiherrann til síns heima í bráðræðiskasti.

En það eru ferfætlingar sem ætlunin var að ræða um og vísa til fyrrnefndrar greinar Borgþórs, sem reyndar er svo góð að ritari hefur litlu sem engu við að bæta, nema því að þeir sem áhuga hafa á varðveislu lífríkis Jarðarinnar okkar, ættu að kynna sér greinina.

Og ekki síður bók Attenborough, því það fer enginn svikinn frá því að lesa það sem hann ritar.

Kína og önnur lönd

 Kínverska alþýðulýðveldið er vinsælt þessa dagana, forsetar Bandaríkjanna og Rússlands heimsækja það með nokkurra daga millibili, fyrir utan það að ritari þekkir vel til mæðgina sem heiðra landið með nærveru sinni þessa dagana.

Forseti Bandaríkjanna var í boði Xi fyrir fáum dögum og núna er það Rússlandsforseti sem heiðrar landið með heimsókn sinni og við sjáum fjallað um þetta t.d. í The Guardian.

Talið er að sá Bandaríski hafi verið ,,slakur" gagnvart þeirri skoðun Kínverja að Taívan sé hluti af Kína.

Trump stendur í stórræðum þessa dagana og bandaríski herinn drepur mann og annan hér og þar, líkt og hann er vanur og nú síðast í Íran; áður var það og seinna verður það eitthvað, hjá ríkinu sem vill ráða heiminum.

Þeir eru á síðustu vikum búnir að ráðast á Venesúela og Íran, auk þess sem Ísrael, sem er mikill ,,vinur" USA, hefur verið duglegt við að drepa mann og annan.

En það voru Kína- heimsóknirnar sem vökti þessar hugrenningar og svo er að sjá sem Kína sé að verða að einhverskonar Sameinuðu þjóðum nútímans.

Það er sama hvað gengur á í veröldinni, ekkert fréttist af þeirri stofnun, enginn notar skó sinn fyrir fundarhamar svo vitað sé og þögnin er ærandi, eins og einhver sagði.

Það er vaðið um með vopnaskaki- og beitingu og lítið sem ekkert er gert til að jafna ágreining, nema síður sé og stóryrði, vopnaskak og beiting vopna eru sem aðall forsetans sem stjórnar ríkinu þar sem hinar sameinuðu þjóðir hittast í samnefndri stofnun.

Eru þær hættar að hittast til að ræða málin og jafna ágreining og varðveita friðinn til að það sem áður gerðist, gerist ekki aftur?

Vonandi tekst að finna boðbera friðar, virðingar fyrir mannslífum og menningarverðmætum.

Boðbera friðar sem hlustað verður á til að jafna ágreining, í stað þess að æða um með upphrópunum, hnefasteytingum og höfuðhnykkjum.

Flutningaskip sökk í Miðjarðarhafi en hvað var það að flytja?

 The Guardian segir frá skipi sem  var á leið til Norður Kóreu en sökk í Miðjarðarhafi og grunur er um að hafi verið að flytja kjarnorkubúnað frá Rússlandi. Skipið hét ,,Stóri björn" og myndin sem hér fylgir var tekin þegar það fór eitt sinn um Bosporus.

Rússneska flutningaskipið var sagt vera á leið frá St. Pétursborg til Vladivostok þegar það sökk við strönd Spánar 23. desember 2024.

,,Ursa Major var 142 metra langt, rússneskt skip í eigu ríkistengda Oboronlogistics-fyrirtækisins og var á leið frá St. Pétursborg til Vladivostok þegar það sökk 62 sjómílur undan strönd Murcia rétt fyrir miðnætti 23. desember 2024.

Ellefu klukkustundum áður hafði spænska sjóbjörgunar- og öryggisþjónustan, Sasemar, sent þyrlu, björgunarbát og dráttarbát til Ursa Major, sem sent hafði frá sér neyðarkall klukkan 12:53.

Önnur skip á svæðinu tóku eftir því að skipið, sem hafði hægt verulega á sér síðustu 24 klukkustundirnar, hallaði mikið og sáu menn að áhöfnin yfirgaf skipið. Áhöfnin sagði björgunarmönnunum að þrjár sprengingar hefðu orðið í vélarrými þess."

Það var slæmt að það sökk en verra er, að varningurinn sem er um borð gæti verið hættulegur umhverfinu, því líkur eru á að hann sé geislavirkur.

Ástæða þess að skipið sökk mun vera að fyrrnefndar sprengingar urðu um borð hafi gert gat á skipið og að sjór hafi streymt inn í það.

Allt er þetta orðið og ekkert er hægt að gera til að breyta því.

Sé það rétt að frá því geti stafað geislavirkni þá er það alvarlegt mál sem taka þarf á með öllum þeim ráðum sem tiltæk eru.

Upplýsingar um hvað það sé sem skipið var að flytja og hvort af því geti stafað hætta ættu að liggja fyrir í Rússlandi og eftir þeim upplýsingum verður að ganga.

Hvort þær liggja á lausu og fást vandræðalaust, veit sá sem þetta párar ekkert um, en brýnt er að allt verði gert sem unnt er til að ekki stafi alvarleg mengun frá flakinu.