Eru jarðgöng lausnin?

 Þeir voru til sem vöruðu við því, að raunhæft væri að höfn á þessum stað yrði nothæf til lengdar og nú hefur það sannast að svo er.

Landeyjahöfn

Staðan er ekki góð, því að ekki hefur tekist að halda hafnleysunni á Landeyjasandi opinni, sem veldur því að sigla þarf til Þorlákshafnar í staðinn, sem reyndar er ekki verri kostur en var áður en Landeyjahöfn varð til.

Þessu til viðbótar er önnur aðalvél ferjunnar Herjólfs biluð og því er ekki hægt að sigla með sama hraða og venjulega, sem kemur sér vissulega illa þegar siglingarleiðin er lengri.

Að því sögðu, þá er ekki verra að fara milli lands og Vestmannaeyja frá Þorlákshöfn og jafnvel betra, því sé ætlunin t.d. að fara á höfuðborgarsvæðið einhverra erinda, þá er akstursleiðin styttri.

Það er sem sé styttri og greiðara að fara um Þrengslin frá Þorlákshöfn til Faxaflóasvæðisins og Suðurnesjanna (Keflavíkurflugvallar), og sé ætlunin að fara austur um, þá er greið leið að fara fyrir neðan Selfoss og síðan þaðan til austurs.

Þannig er hægt að losna við hina ömurlegu umferðarteppu sem er í gegnum Selfoss, sem reyndar horfir til betri vegar, þ.e.a.s. þegar hin nýja brú fyrir ofan Selfoss kemst í gagnið.

Og eins og við vitum, þá kann Framsóknarflokkurinn lausn á þessum vanda sem öðrum, því fyrrverandi formaður flokksins fann draumaprins í Ameríku sem hafði lausn á þessum vanda og eflaust mörgum öðrum!

Sá ætlaði að stinga í samband við íslenskt rafmagn, hátækni töfrabor sem átti að búa til göng til Vestmannaeyja með því að bræða bergið, en eins og oft er með framsóknarboðskapinn, þá var um töfrabrögð að ræða og ritari minnist þess t.d. ekki að hafa séð hvað átti að verða um hið bráðna berg sem yrði til í þessu merkilega gangagosi!

Hvað það var sem kom fyrir aðra aðalvél Herjólfs veit ritari ekki, en alvarlegt hlýtur það að vera eitthvað talsvert fyrst ekki er hægt að gera við vélina og illt er fyrir Vestmanneyinga að búa við þá stöðu sem nú er.

Unirritaður hefur nokkrum sinnum farið milli lands og eyja, bæði frá Þorlákshöfn og Landeyjahöfn.

Það gekk vandræðalaust og það verður ekki fullyrt hér, hvort ferjan sem farið var með, frá og til Þorlákshafnar, var gangmeiri en sú sem nú siglir fyrir hálfu vélarafli þar á milli.

Komin er af stað vinna við að kanna berglögin sem fara þarf í gegnum til að gera göng (með gamla laginu) milli lands og Eyja en ef sú vinna leiðir til þeirrar niðurstöðu að það sé gerlegt að bora göng þá yrði það væntanlega góð lausn.

Við búum í eldvirku landi og því þarf að fara gætilegar en ef svo væri ekki.

Það gaus á hafsbotni og þá myndaðist Surtsey, og það gaus í Vestmannaeyjum sjálfum, sem seint gleymist, og það gaus í Eyjafjallajökli og Heklu.

Katla gaus síðast 1918 sé rétt munað og ef til vill er einhverjum gosum gleymt, en við verðum að treysta vísindamönnunum varðandi það hvort raunhæft sé að gera jarðgöng milli lands og Vestmannaeyja.

Töfraborinn Framsóknar er tæpast inn í myndinni!

Gott er að hafa ,,borð fyrir báru"

 

,,Zelensky segir“ og ófriðurinn í heiminum

Apr 6, 2026

Óflokkað

Fastir liðir eins og venjulega og Morgunblaðið segir frá því að verið sé að ræða saman og fyrst svo langt er komið er trúlega líka verið að hugsa.

Úrklippa úr Morgunblaðinu

Ritari bregður sér af bæ til að sleikja sólina, njóta blíðunnar, góðs matar og almennra huggulegheita og kemur svo heim og kemst þá að því, að fátt er breytt í heimsmálunum og fyrir því höfum ekki ómerkari miðil en BBC.COM.

Þar á bæ er heimildin sögð vera Zelensky nokkur, sem við munum m.a. eftir á Þingvöllum í boði burtsofnaðrar ríkisstjórnar.

Þær eru orðnar æði margar fréttirnar sem byrja á ,,Zelensky segir“ og sannleikurinn er sá að maðurinn segir eitt og annað og það svo margt, að það er að æra óstöðugan að reyna að festa hönd á því öllu sem frá honum hefur borist.

En hvað sagði maðurinn? Jú hann sagði að bandamenn Úkraínu hafi farið fram á að Úkraínar héldu aftur af sér í árásum á rússneska orkuinnviði.

,,Óljóst er hvaða lönd hann gæti hafa átt við en Kína og Indland eru enn mjög háð rússneskri olíu og ESB löndin rússnesku gasi“, segir í fréttinni og ættu það svo sem ekki að vera ný tíðindi.

Rússland er orkuríkt land og muna má, að það þótti gott að geta snúið sér þangað þegar ,,vestrænir“ vildarvinir ætluðu að sjá til þess að Ísland fengi ekki olíu í gömlu stríði um þorska og aðra fiska.

Það er hægt að stríða um allt mögulegt og fiskurinn í sjónum er eitt af því eins og dæmin sanna.

Við munum líka þegar vestrænir ,,vinir“ Íslands ætluðu að olíusvelta íslenska þjóð, að þá þótti gott að snúa sér til Rússlands sem þá hét reyndar Sovétríkin, CCCP, USSR eða hvað það sem menn helst vilja nota.

Olían var góð og breyttist ekki í vaxköggul þegar kólnaði í veðri og ekki þótti verra að Ísland náði á endanum yfirráðum yfir fiskimiðum sínum, eða a.m.k. þangað til bestu vinum aðal, dettur í hug að þá langi í fisk án þess að hann sé veiddur af íslenskum sjómönnum.

Þeir hafa sýnt það áður og geta gert það aftur, bara ef það hentar þeim.

Ritari hefur grun um að olían rússneska, hafi verið geymd í tönkum sem staðsettir voru Hvalfirði, enda gerðist þetta allt á þeim tímum þegar menn voru ekki búnir að finna það út, að besta af öllu væri að varðveita eldfimt eldsneyti í Örfisey, væntanlega vegna þess hve yfirmáta heppilegt það væri að flytja olíu í tankbílum í gegnum endilanga borgina.

Þessi ráðstöfun hefur verið gagnrýnd, en hummarar þjóðarinnar hafa hummað fjasið fram af sér eins og þeirra er vani.

Við vitum að vinur er sá sem í raun reynist og við þurfum ekki að telja okkur trú um eitthvað annað.